We 23. raji PlusLigi GKS Katowice rozgrywoł siatkarske derby Ślōnska z drużynōm Jastrzymbskigo Wōngla we hali OS Szopienice. Kolejny roz w składzie meczowym GieKSy brakło przijmujōncego Jakuba Szymańskigo. Cylym naszych siatkorzy było wywalczynie punktōw w szpilu z faworytym i przedużynie szans na plac w piyrszyj ōsymce tabule. Po roz piyrszy do katowickij hale w roli gracza jastrzymbiokōw zawitoł nasz były szpiler Rafał Szymura.

Poczōntek spotkanio był dość rōwny, dopiyro nasze problymy ze skōńczyniym akcji po przijyńciu sprawiyły, że kōnieczne było skorzystanie z pauzy przi wyniku 7:3 do gości. Porapunktowo przewoga jastrzymbiowkōw utrzimywała sie skuli tego, co gracze ôd Andrei Gardiniego wartko kōńczyli akcje po ôbrōnie i niy pozwolali nōm na korzystne serie mimo mocy błyndōw w polu zagrywki. Sytuacyjo zaczła sie zmiyniać na nasza korzyść. Po bloku Jakuba Jarosza i serii szumnych zerwisōw ôd Kamila Kwasowskigo (16:17) moglimy mieć nadzieja na ôdmiana losōw partje, kero stowała sie coroz ciekawszo. Po ataku Rafał Szymury w nec na tabuli wynikōw ukozoł sie rymis 21:21 i widoki na dobry finisz. Entlich ô losach seta zdecydowały dwie ôstatnie akcje, to znaczy pewny atak Jurija Gladyra i niycelne uderzynie ôd Kwasowskigo (23:25).



Nostympny set zaczlimy ôd trzech stracōnych punktōw po zagrywkach Szymury, co mogło popsuć nasze plany. Straty nadrobioł swojim sprytym Adrian Buchowski, a po blokach Kohuta i Firleja wrōciylimy na właściwe tory (6:6). Widać było, że wrōciyła staro, dobro GieKSa – pewno w przijyńciu, skuteczno w ataku i ôbrōnie, a ku tymu dokłodajōnco do szpilu trocha fantazje. Już w połowie seta było jasne, że ô wyniku zaś zadecydujōm detale. Po drugij z rzyndu wymianie zakōńczōnyj punktym do jastrzymbiokōw potrza było 30 sekund pauzy (15:18). GKS durś walczōł ô ôdrobiynie strat, co udało mu sie po udanym ataku ô blok Jarosza – tyn atak był podsumowaniym wytrwałego i spokojnego granio. Dziynki wygraniu wożnego punktu po weryfikacji wideo i punkcie Jarosza, bohatyra tyj partie, dokludziylimy do rymisu w setach (25:23).

Widać było, że porażka podrzaźniyła siatkorzy ze Jastrzymbio, kerzi ôdpowiadali szczelnym blokym i presjōm na zagrywce (3:6). Tym razym siatkorzom GieKSy brakło cylności, co ôdbijało sie na rezultacie. Po asie serwisowym ôd Szymury było już 12:7 do przijezdnych i trza było szukać nowych knifōw na poprawa naszego granio. Wrōciylimy do wytrwałego, rzetelnego rozgrywanio swojich akcji i to pōmōgło nōm zmyńszyć prowadzynie przeciwnika. Jednak tyn ôdpowiadoł ôdczytywaniym naszych zamiarōw i mocnym blokym, bez co na szpilplac musioł wlyźć Jakub Nowosielski (15:20). Mimo mocy staranio ôd katowickich siatkorzy i pokozanyj determinacje set zakōńczōł sie wygranōm przeciwnikōw 25:20.

GALERIA Z PLUSLIGOWYCH DERBÓW ŚLĄSKA (ZOBACZ)

GKS wloz w czworto partio z nowymi siyłami, a po udanych akcjach prezyntowoł uciecha charakterystyczno do... drużyn z Azje. Gralimy na granicy ryzyka, ale tak trza było grać z jednym z nojlepszych mańszaftōw w Polsce (8:7). Goście z hajerskigo miasta poradziyli ôdpedzieć punktami blokym, a po udanyj zagrywce Szymury kōnieczno była interwyncjo trynera Słabego. Ôdpowiydź GieKSy była gibko, pokozalimy blokym Buchowskigo (12:12), że bydymy walczyć do kōńca. Set bōł połny szalōnych ôbrōn, kere utrzimywały nos w grze, ale za czynsto podowalimy rynka rywalōm, co poskutkowało seriōm, kero dała jastrzymbiokōm wynik 20:17. Robiylimy absolutnie wszyjsko, by niy pozwolić na zakōńczynie spotkanio i dziynki pojedynczymu blokowi Kwasowskigo bylimy ô krok ôd tie-breaka. Gra na przewogi zakōńczyła sie dwōma perfekcyjnymi zagraniami GieKSy, punktym ôd Buchowskigo i zapewniyniym sie punktu (28:26)!

Ôstatnigo seta trocha lepij zaczli szpilery ôd trynera Gardiniego, jednak GKS wartko dokludziōł do rymisu 4:4 po tym, jak Kwasowski wygroł bōj ô bal na necu. Życie uprzikrzoł nōm Szymura (kery przeca dobrze zno naszo hala), a strōny szpilplacu zmiynialimy przi wyniku 8:5 do jatrzymbiokōw. Tym razym niy moglimy postawić sie mocnymu rywalowi, kery chyntnie korzystoł z kożdyj szansy na punkt i czynsto blokowoł nasze trefiynia. Zakōńczylimy szpil wynikym 15:9 do Jastrzymbskigo Wōngla, a cołke przedstowiynie mogło sie podobać fanōm PlusLigi.

Jak czytać śląskie znaki?

Ô – „ło”
Ō – dźwięk między „o” a „u”